Det var fullsett sal i bedehuset under årets bedehusbasar torsdag. Bedehusbasaren kvar sommar har no vorte den
einaste basaren som vert halden i bedehuset i Lunde i løpet av året, og inntekta frå loddsalet går kvart år til drift
og vedlikehald av huset.

Styremedlem og kasserar Lorentz Lunde opna kvelden med å ynskja vel møtt og med å fortelja litt om drifta og huset.

– Me er heldig som har eit hus som framleis er i så god stand, og me har òg vore heldige og har motteke fleire pengegåver, som har gjort det mogleg å gjera forefallande vedlikehaldsarbeid, seier han.

Vidare kalla Lunde styremedlem Helga Økland opp til preikestolen. Ho har no valt å trekkja seg frå styret, etter eit langt liv som aktiv i laget. Ho kunne fortelja om kor mykje bedehuset, musikklaget og bedehuslaget har betydd for ho, heilt frå ho var lita jente og byrja på sundagsskulen. Lunde overrekte ei gåve frå laget, som takk for lang teneste.

Til å halda preik for dagen var Marit Roseth Belt henta inn. Ho haldt ei fin preik som òg engasjerte ungane, der ho mellom anna las frå Lukas 24. Ho og gitaren hennar var også forsangar for kjente, kjære songar for store og små, undervegs i basarkvelden.

Som vanleg på bedehusbaseren, vart det diska opp med heimebakte bollar og kaker, kaffi og saft til ungane, og då alle var mette og forsynte, kunne ein setja i gong med åresalet. Det var mange fine premiar å lokka med også i år.

Bedehusbasaren 2010 samla inn heile kr 30.275,- til bedehuset og laget. Kasserar Lorentz Lunde sa seg godt nøgd med resultatet.

Trekningsliste, lodd på bok:

Dukke: Bjørg Nesland
Sparksykkel: Karoline H. Hansen
Leiketelt: Siren Nilsen
Gåvekort, Mandelhuset: Elise Tvedt
Gåvekort, Fix-It: Hanne K. Lunde
Dbl. sengesett: Fam. John T. Malkenes
Duk: Bernhard Belt
Solstol m/pute: Ole Johannes Malkenes
Gåvekort, Galanten: Per Ivar Bergesen
Gåvekort, Hårlokken: Fam. Per Økland
Fiskeskrin: Bernhard Belt
Applikert løpar: Jørgen Haaland, Lunde
Applikert løpar: Ingeborg Sætre

Alle foto: Malin Tvedt Petterson